Damb era tòca de méter en valor era riquesa e era diuersitat deth patrimòni culinari catalan e dar sosten ar An dera Region Mondiau dera Gastronomia de Catalonha, es tres conselhs comarcaus dera Rota Cisterciana (Naut Camp, Conca de Barberà e Urgelh) an editat amassa un mapa enogastronomic deth territòri. Se tracte d’ua airina que permet ath visitaire descorbir facilament es productes, productors, chais, restaurants e lotjaments de cada zòna e que recuelh es eveniments e hèstes gastronomiques que se debanen ath long der an, en tot convertir-se en ua guida indispensabla entàs afogats deth bon minjar e torisme responsable.
Es productes autoctòns, coma es vins damb sies Denominacions d’Origina, es calçòts e eth torrom damb IGP, er òli d’oliva vèrge extra, eth chicolate, es embotits tradicionaus, era truha, es còques de recapte, es fruts secs e es productes damb carróbia, era mèu, es carquinhòlis,... son solament quauqui exemples deth tresaur culinari qu’aufrís Era Rota Cisterciana.
Aguest 2025, er An dera Region Gastronomica met era amira ena valor deth producte locau e sostenible, e en besonh de refortir er enotorisme, er agrotorisme e era codina de territòri coma motors de desvolopament rurau. En aguest sens, era Rota Cisterciana ei un exemple viu de coma era gastronomia pòt agir coma èish vertebrador deth torisme culturau e sostenible.
Cau rebrembar qu’era Rota Cisteciana la formen es monastèris de Santes Creus, Poblet e Vallbona de les Monges, emblèmes arquitectonics dera zòna e espacis de preservacion deth saber culinari, de coitiu e transformacion d’aliments. Damb aguesta iniciativa, era Rota Cisterciana reafirme eth sòn compromés damb era codina de proximitat, era sostenibilitat, era innovacion e era divulgacion dera cultura gastronomica catalana. Ua oportunitat unica entà plaçar-se coma destinacion de referéncia laguens e dehòra deth país.
Eth nau mapa enogastronomic se pòt trobar ena sedença des Conselhs Comarcaus de Naut Camp, Conca de Barberà e Urgelh e tanben enes burèus de torisme d’aguestes tres comarques.
Mès informacion:
