Era Diputació de Lleida presentèc era campanha “Pòble petit, grana vida” en Palau Robert de Barcelona, en passat noveme, ua iniciativa que vò mostrar es oportunitats e es beneficis de víuer enes municipis ruraus dera demarcacioon. Ua accion que vò collaborar a combàter eth despoblament e atrèir famílies urbanes entà que descorbisquen era qualitat de vida, tranquillitat e connexion damb era natura qu’aufrissen es pòbles petiti.

Era campanha persute ena oportunitat entà transformar es pòbles deth territòri en lòcs més equilibradi e atractius e dera importància d’impulsar politiques que fomenten er abitatge, era ocupacion e era retencion deth talent en aguestes zònes. Entad açò, cau avançar ena melhora des servicis publics e des infrastructures. Víuer en un pòble és sinonim de salut, de libertat e de comunitat, ath madeish temps que permet ua vida rica e plea de possibilitats tant en encastre personau coma professionau.

“Pòble petit, grana vida” presente testimònis reaus de persones qu’an decidit establir-se en pòbles petiti, coma era corredora de montanha Núria Picas o era artista muralista Lily Brick, e se pretén trincar era estigmata qu’era vida rurau és mens atractiva qu’era urbana. També i participen d’auti prescriptors, coma era directora dera Escòla Tuixent, Belén, que hè pòqui mesi partic de Sant Pere de Ribes entà anar a viure en La Vansa i Fórnols, o coma Ricard, un arquitècte que teletrabalha e s’encargue der urbanisme des hilats de Repoblem.

Damb aguesta campanha era Diputació de Lleida vò revindicar era valor des pòbles ruraus coma motors de benèster e oportunitats, mostrar era sua riquesa naturau, culturau e paisatgística, e presentar-les coma ua alternativa ideau entad aqueres persones que cerquen un cambiament de cap a ua vida més sostenibla e salutosa.