Era Rodibook 24, er eveniment motociclista non competitiu per excelléncia der Estat espanhòu, a artenhut en aguesta tretzau edicion un recòrd d’assisténcia damb mès de 1.400 participaires —55 d’eri pilòts femenins— e 53 acompanhaires. Ena dimenjada mès motard der an en Vielha, eth 30 e 31 d’agost, es inscriti an hèt entre 450 e 750 quilomètres per endrets espectaclosi des Pirenèus catalans e francesi.
En tot seguir era normativa der eveniment, er itinerari se mantenguec en secrèt enquiara net deth 29 d’agost, ues ores abans de començar era aventura. Es participaires lo descorbissen damb era unica ajuda d’un libre de rota, eth roadbook, en tot passar pes punts de contraròtle establidi pera organizacion.
Era activitat motard a impulsat de forma destacada era activitat toristica e otelèra de Vielha, qu’a acuelhut participaires de diferentes comunitats autonòmes, mès que mès de Catalonha, Madrid, eth País Valencian, Andalosia e eth País Basc. Eth baile dera localitat e vicepresident deth Patronat de Torisme dera Deputacion de Lhèida, Juan Antonio Serrano, a arregraït eth trabalh de toti es volontaris qu’an collaborat en eveniment esportiu e, fondamentaument, eth de Rodi Motor Services, organizador der eveniment, “que cada an met Vielha en mapa”.
D’un aute costat, era madeisha setmana Vielha tanben siguec eth centre neuralgic deth Summer Camp, ua amassada europèa LGTBI d’afeccionadi as mòtos en tot convertir era localitat aranesa en capitau deth motorisme. I participèren 210 persones procedentes principaument deth Reiaume Unit, França Itàlia, Païsi Bashi e Belgica.
Cau rebrembar qu’eth Patronat de Torisme ei present en aguestes iniciatives motards mejançant eth projècte Motorisme Ara Lleida. Eth projècte Motorisme Ara Lleida (https://moturisme.com/ca) ei un producte toristic impulsat dempús der an 2015 peth Patronat de Torisme dera Deputacion de Lhèida, damb era tòca de promòir de manèra especifica eth torisme entre eth collectiu d’afeccionadi a viatjar en mòto. Aguest projècte establís un sistèma de garentida qu’identifique actuaument 52 establiments de lotjament toristic e 44 servicis complementaris de restauracion, cafetaries e musèus entre de d’auti.
