La Granadella celèbre es actes de commemoracion deth detzau aniversari dera creacion deth Centre dera Cultura der Òli de Catalonha (CCOC) e ac hè damb diferentes activitats culturaus. Era prumèra se debanèc eth passat 20 de seteme, damb ua charrada dera doctoressa en nutricion Antonieta Barahona, ena quau expliquèc es beneficis der òli d’oliva vèrge extra e era sua importància en ua alimentacion equilibrada. Era conferéncia anèc acompanhada d’un showcooking damb era elaboracion e tastet de tapes salutoses.
Era dusau jornada se debanarà eth dissabte 25 d’octobre, damb eth títol: “Paraules damb gost d’òli”. En aguesta escadença, er escrivan Pau Sabaté presentarà era sua òbra El llibre de l’oli e se daurirà un debat entre er autor e eth public assistent.
Per çò qu’ei dera tresau e darrèra session se desvoloparà eth dissabte 1 de noveme en encastre dera 11au edicion dera Hèira der òli Era Prumèra Premsada. En aguest encastre heirau se presentarà eth libre de codina de recèptes tradicionaus de La Granadella Receptes amb memòria, editat damb motiu des 10 ans deth CCOC e laguens dera iniciativa 12 mesi, 12 païsatges de Catalonha Region Mondiau dera Gastronomia 2025. Tanben s’amiarà a tèrme un showcooking e un tatet entà barrar er acte.
Es diferentes sessions s’amien a tèrme en madeish Centre dera Cultura der òli e compden damb eth supòrt deth Departament d’Agricultura, Ramaderia, Pesca e Alimentacion dera Generalitat de Catalonha.
Pendent es dètz ans de foncionament, eth CCOC s’a auborat coma un espaci de referéncia en Catalonha en mon der òli, maugrat que tanben s’a daurit a d’autes activitats non necessàriament relacionades damb er òli. S’i an hèt charrades, conferéncies, eth cors dera pèira seca, activitats des diferentes edicions dera hèira der òli, talhèrs damb escòles, exposicions e grops de tastets, entre d’auti.
Mès informacion:
