Eth mes d’octobre venent Sant Fruitós del Bages (Barcelona) acuelherà eth Global Ecotourism Forum (GEF) 2025, un eveniment qu’amassarà expèrts internacionaus, lidèrs institucionaus e agents locaus entà redefinir eth futur der ecotorisme e deth torisme sostenible.
Liderat pera Generalitat de Catalonha, a trauès des departaments de Territòri, Abitatge e Transicion Ecologica e d’Enterpresa e Trabalh, damb era collaboracion dera Direccion Generau de Torisme, era Deputacion de Barcelona e eth supòrt de multiples enterpreses e institucions estataus e internacionaus dera comunitat d’expèrts e professionaus der ecotorisme, eth fòrum s’organize laguens deth quadre dera Taula d’Ecotorisme dera quau hè partida Patronat de Turisme de la Diputació de Lleida.
Era amassada servirà ta debàter solucions concrètes entà abordar es granes escomeses deth sector: a compdar deth cambiament climatic enquiara accessibilitat, er includiment, eth torisme regeneratiu e era innovacion tecnologica. Er ecotorisme ei era practica que mès impulse eth desvolopament rurau sostenible e, melhorar-lo e potenciar-lo ajude non solament a evitar era despopulacion, mès tanben favorís era conscientizacion der ensem des ciutadans en relacion ath patrimòni naturau. Per açò, es objectius deth congrès son, d’un costatimpulsar e melhorar er ecotorisme en Catalonha a nivèu globau e der aute ajudar er ensem deth sector toristic catalan entà qu’adòpte principis der ecotorisme entà hèr un sector mès fòrt, resilient, regeneratiu e exemplar a nivèu globau.
Eth programa deth congrès includís diuèrses activitats coma conferéncies magistraus e debats tematics damb reportaires internacionaus; taules redones entà compartir experiéncies e generar prepauses; visites a Living Labs en espacis naturaus protegidi de Catalonha, e espacis de networking e d’escambi d’iniciatives.
Era cita serà deth 22 ath 24 d’octobre deth 2025 en otèl Món Sant Benet (Sant Fruitós del Bages). Es inscripcions e era venda d’entrades ja son dubèrtes e se pòden formalizar a trauès deth web deth congrès.
