Eth Patronat de Torisme dera Deputacion de Lhèida collabòre damb eth Lleida Trail Tour, ua iniciativa d’Open Trail Races qu’a per tòques promòir aguest espòrt e plaçar eth Pirenèu e es Tèrres de Lhèida coma destinacion activa e sostenible de trail running pendent tota era annada, e tanben atrèir corredors entà participar en aguesta disciplina esportiva.

Ath long de diuèrsi mesi, es participaires auràn era escadença d’immergir-se en païsatges naturaus espectaclosi mentre hèn tèsta a ua seria d’escomeses esportives. Aguest seteme, era corsa protagonista serà La Foranca d’Alàs e Cerc (Naut Urgelh) e se sortejaran sies prèmis entre toti es classadi damb Open Trail Races: dues inscripcions tà La Foranca e quate experiéncies de rafting en Parc deth Segre de La Seu d’Urgell. En octobre, era corsa que mercarà eth calendari deth Lleida Trail Tour serà era Mont-roig Trail de Camarasa e Sant Llorenç de Montgai (Noguèra) e en noveme, era Camins de Fusta de Sant Guim de Freixenet (Segarra).

Era corredora lheidatana Sílvia Puigarnau, responsabla deth centre INEFC de La Seu d’Urgell, ei era prescriptora deth projècte, que combine espòrt e descubèrta deth territòri. Puigarnau guanhèc era medalha de bronze enes campionats d’Euròpa Ultra 2019, demorèc en tresau posicion ena Madeira Skyrace de 2022, en dusau posicion ena Canfranc Maraton e en quatau posicion ena Ultra Pirineu 2023. Ath delà, compde damb diuèrsi top 10 ena copa deth mon d’Skyrunning.

Se pòt consultar tota era informacion deth Lleida Trail Tour en aguest ligam. 

Cau rebrembar que eth Patronat de Torisme dera Deputacion de Lhèida trabalhe dempús de hè ans ena promocion deth trail running. En aguest aute ligam podetz trobar ua prepausa de circuït tà cada comarca.