Er Ajuntament de Tàrrega trabalhe en inventari e era catalogacion des libres e es objèctes que formaràn part dera futura Casa Musèu dedicada a Manuel de Pedrolo. Er objectiu ei preservar e méter en valor eth legat der escrivan, ua des figures mès subergessentes dera literatura catalana deth sègle xx.

Eth Musèu Comarcau der Urgelh-Tàrrega s’encuede der inventari exaustiu des libres que compausen era bibliotèca personau de Pedrolo e inventarie e catalògue eth mobiliari e objèctes personaus der escrivan e era sua familha. Era bibliotèca familhau des Pedrolo conten enquia 12.000 exemplars, damb dedicatòries d’autors reconeishudi —Joaquim Carbó, Maurici Serrahima, Josep Vallverdú, Camilo José Cela, etc.—; edicions especiaus; versions originaus en anglés, francés, italian e portugués; traduccions e edicions supervisades per Pedrolo; e de d’auti libres damb notacions personaus der escrivan.

Egaument, e mercés ara collaboracion dera hilha der autor, Adelais de Pedrolo, s’amie a tèrme era catalogacion des objèctes personaus e mòbles dera casa, per çò que mercés ada era s’a pogut identificar era istòria de diuèrsi objèctes e mobiliari. Per exemple, s’an catalogat mòbles deth sègle xviii e xix, provenenti des familhes des pairs de Pedrolo, e objèctes personaus coma es sòns quadèrns d’escòla.

Era Casa Musèu Manuel de Pedrolo serà plaçada ena bastissa a on auie era casa pairau er escrivan, en carrèr Major de Tàrrega. Serà un espaci de referéncia entara conservacion deth patrimòni literari e personau d’un des autors mès influents dera literatura catalana. Eth projècte presèrve era memòria de Pedrolo e permeterà as futurs visitaires gaudir d’un recorrut immersiu pera sua vida e òbra. Er equipament compdarà ath delà damb un centre d’estudi ath torn dera sua vasta òbra.