“Descorbís Catalonha damb un guardar matematic” a per tòca fomentar un torisme familhau damb ua prepausa singulara que convide a descorbir endrets d’interès dera ciutat de Lhèida a trauès d’escomeses matematiques. Eth punt de partida d’aguest itinerari ei eth burèu de torisme qu’era Generalitat de Catalonha a en Lhèida, e que se convertís d’aguesta manèra en punt de referéncia dera iniciativa.

En cas dera capitau deth Segrià, es endrets que se pòden descorbir damb aguesta naua rota son era Seu Vella, era plaça Sant Joan, era Paeria, eth Pònt Vielh, es Camps Elisis e era hònt des Piques. Entà participar en aguesta iniciativa, en prumèr lòc cau recuélher un plan e ua calculadora en Burèu de Torisme, dempús s’a de consultar ena mapa es lòcs que se vòlen visitar, seguidament resòlver un problèma enes diferenti espacis monumentaus e fin finau cau tornar eth materiau.

Eth plan e era calculadora scientifica includissen retrats illustradi de matematicianes catalanes qu’an ua relacion especiau damb eth territòri que se visite. Era mapa, ath delà dera rota e es escomeses matematiques, includís ua biografia dera matematiciana catalana aumenatjada e qu’a ua relacion especiau damb eth territòri. Era reusenca Eva Miranda Galcerán, distinguida damb eth Prèmi François Deruyts, ei era matematiciana escuelhuda entara rota de Lhèida, per çò que viuec tota era sua enfància e joenessa ena capitau deth Segrià. Era illustracion l’a hèt Lily Brick.

Eth projècte tanben s’a metut en marcha en Barcelona, Girona, Tarragona e Tortosa. Aguestes rotes hèn part dera iniciativa “Descorbís Catalonha damb un guardar matematic”, ua prepausa impulsada pera Generalitat, per miei dera Direccion Generau de Torisme deth Departament d’Enterpresa e Trabalh, amassa damb Casio, enterpresa encargada de cedir es calculadores.