Eth Patronat de Torisme dera Deputacion de Lhèida, amassa damb es representants des diferenti subsectors d’alotjament toristic dera demarcacion, prevé poder revalidar aguest ostiu es guarismes der an passat, que barrèc era sason deth 2021 damb es milhors donades de toti es tempsi, uns resultats que representèren un 8% mès de pernoctacions respècte ar an 2019, abans dera pandèmia. En concret, er ostiu passat se compdabilizèren uns 550.000 viatgèrs e 1,5 milions de pernoctacions enes establiments de torisme reglat dera demarcacion de Lhèida.

Aquestes bones expectatives deth sector vien avalades tant peth nivèu des resèrves actuaus coma peth bon comportament toristic qu’a registrat era demarcacion de Lhèida pendent es dus ostius en periòde de pandèmia, ath delà des boni resultats deth sector pendent eth prumèr quadrimèstre d’aguest 2022. Ath delà, eth torisme actiu a encetat era naua sason damb 271 empreses, 43 mès qu’abans dera pandèmia, causa que represente un revulsiu entara naua campanha e que mòstre era fortalesa e era confiança deth sector empresariau. Er objectiu ei superar per prumèr viatge es 800.000 servicis pendent ua sason ena quau un aute des rèptes ei recuperar era arribada de visitants estrangèrs, qu’an registrat ua important reduccion ena demarcacion de Lhèida enes darrèrs dus ans de pandèmia.

Es representants deth sector toristic lheidatan heren aguestes previsions en cors d’ua ròda de premsa hèta ena Val d’Aran, ena quau tanben s’informèc sus era campanha de promocion toristica començada peth Patronat de Torisme dera Deputacion, que pòrte per lèma ‘Lleida, t’espera de nou. Vine i viu-la!’. Aguesta campanha fixe er objectiu en un public familiau qu’a ganes de practicar activitats en aire liure, descorbir es mila e una prepauses qu’aufrís era demarcacion.