Pòqui endrets pòden arremassar era nauta e mieja montanha damb ambients pseudoestepics coma ei eth cas dera demarcacion de Lhèida, connectadi a mens d'ua ora de distància en veïcul. Damb aguesta idea, eth dimars 10 de mai, tres professionaus deth sector naturalista artenheren eth sòn rèpte: recórrer tot eth territòri de Lhèida pendent 24 ores detectant eth mès gran nombre possible d’audèths e promocionant eth Pirenèu e es Tèrres de Lhèida coma destinacion ornitologica de prumèr nivèu. E vertat ei que, damb es resultats ena man, era experiéncia siguec tot un succès, puish qu’enes 24 ores estipulades es tres ornitològs observèren 168 espècies enes mès de 700 quilomètres de recorrut peth territòri lheidatan.

Era experiéncia se promocionèc enes hilats sociaus a trauès dera etiqueta #CercaMoixo24h e se poguec seguir en temps reau eth nombre d’espècies observades, atau com es diferenti espacis naturaus pes quaus se passèc. Er eveniment se hec priorizant eth benèster dera fauna e flòra des lòcs que se visitèren, atau coma respècte per entorn entà evitar impactes en mèdi naturau.

Era equipa d’experts ère formada per Sergi Sales, ornitològ professionau des de hè mès de 20 ans, qu’a estat membre deth Comitè de Rareses de SEO/BIRDLIFE e deth Comitè Avifaunistic de Catalonha; Cesc Capdevila, ornitològ e guida de natura en Naut Pirenèu; e Enric Morera, anerador scientific d’audèths professionau e tecnic deth projècte Espacis Naturaus de Ponent.

Es objectius deth #CercaMoixo24h èren potenciar eth Torisme ornitologic enes Tèrres de Lhèida e eth Pirenèu a escala nacionau e estrangèra, promocionar era estimacion e preservacion des abitats singulars e unics que se tròben en airau e méter en valor un modèl ecotoristic que genère riquesa en territòri e fomente era sostenibilitat.

Eth rèpte s’inicièc de cap as 9 deth vrèspe deth 9 de mai. Er airau de mostreg d’audèths comencèc enes secans deth Segrià e Utxesa, entà pr’amor de poder  observar audèths estacadi as canes der entorn des rius, com era merlenga de mostachos; ben entrada era net, e pendent eth recorrut enquiath Parc Naturau deth Naut Pirenèu, tanben se descobiren totes es espècies nocturnes. Un còp arribadi en Parc Naturau e damb er acompanhament des tecniques deth parc, se veigueren espècies tipiques d’aqueri espacis, mès que sense poder detectar eth paum, ja qu’ei eth moment dera cria e trobèren prudent de non insistir ena sua observacion. Era rota contunhèc baishant eth Pòrt dera Bonaigua e er airau de Boumort, a on se pogueren veir es quate audèths carronhassèrs presenti en Euròpa, a part de d’autes espècies coma era verderòla o eth godal, tipics des còtes mès nautes. Er espaci naturau des vals deth Sió-Llobregós ère era següenta parada, e s’i arribèren a detectar espècies coma eth còlit ros o er ortolan, ua espècia migranta que ja demorauen de poder veir en aguest parçan, atau tanben es arrasarius e es orongletes, qu’ara se pòden veir en Catalonha.

Un còp arribadi ena lana de Lhèida, es tres ornitològs recorreren er espaci naturau des Plans de Sió, er estanh d’Ivars e Vila-sana e es secans de Mas de Melons e Alfés, e i pogueren observar ua bona mòstra des espècies estepiques e pseudoestepiques mes emblematiques, com eth soriguèr petit, eth sison, era ganga, era terrerola vulgara e era rogenca, eth capsigrany, eth tòrlit o era calandreta. Damb mès de 140 espècies vistes enquia mieja tarde, es tres ornitològs acabèren eth sòn rèpte ena confluéncia Segre-Cinca, damb era localizacion der audèth blu, eth martinet ros, eth faucom mostachut o eth mosquèr gris.

Per un aute costat, pendent eth trajècte s’arribèren a detectar quauques espècies excepcionaus, com ara era agla imperiau o er aligot rogenc, dus audèths que s’obsèrven en estranhes ocasions e qu’es ornitològs ne voleren destacar era oportunitat d’auer-les pogut veir.

Aguesti tres ornitològs acabèren aqueth CercaMoixo24h a trauès des hilats sociaus explicant as sòns seguidors era quantitat recòrd d’espècies observades e eth recorrut pes Tèrres de Lhèida e Pirenèu, e tanben heren mencion deth supòrt recebut per part des diferentes entitats e agents qu’ac heren possible. Eth cens des fotografies des audèths se poiràn veir e se poiràn consultar ena web deth projècte Espais Naturals de Ponent.

Damb aguesta accion, se refortís er objectiu de potenciar eth torisme ornitologic enes Tèrres de Lhèida e eth Pirenèu a nivèu nacionau e tanben a nivèu internacionau, promocionar era estimacion e preservacion des abitats singulars e unics que se tròben en aguesti parçans e méter en valor un modèl ecotoristic que genère riquesa en territòri e que fomente tanben era sostenibilitat.

Era accion compdèc damb eth supòrt deth Patronat de Torisme dera Deputacion de Lhèida, era Associacion Leader de Ponent –damb era promocion e difusion d’aguesta curiosa accion e es sòns resultats a trauès deth projècte Espais Naturals de Ponent–, eth Parc Naturau deth Naut Pirenèu, era Fondacion Plegadis e Swarovski Optik.

Tres ornitològs recorren 700 quilomètres dera demarcacion de Lhèida en 24 ores. Foto: @Espais Naturals de Ponent