Es dies 25, 26 e 27 de març se celebrarà eth Dynafit Skimo Pirineu  en Boí Taüll, era Vall de Boí (Nauta Ribagorça), un eveniment esportiu entàs aimants deth skimo, era montanha e eth torisme esportiu e familiar.

Aguest eveniment sage de fomentar e possar era practica deth skimo per equips e en familha en un entorn accessible e segur. Er objectiu ei de méter un especiau emfasi ena formacion e era divulgacion dera bona praxi, com ua manèra d’accedir entara nauta montanha. Eth Dynafit Skimo Pirineu ei pensat entad aqueres persones que ja practiquen aguest espòrt, mès tanben entà totes aqueres que se i inícien o que se senten interessadi e ac volerien hèr.

Pendent era celebracion des jornades s’i disputaràn 3 challenges:

• Challenge Vall de Boí 1250m+, entad aqueres persones que les agrade eth skimo que ja an cèrti coneishements dera practica d’aguest espòrt.
• Challenge Alta Ribagorça 750m+, entà practicants que s’inícien e vòlen milhorar e tanben tàs que practiquen splitboard.
• Marcha Boí Taüll 560 m+, entad aqueres persones que vòlen practicar en grop o en familha e que volerien iniciar-se per prumèr còp en un circuit accessible e segur.

Er eveniment aufrís prepauses mès competitives, atau coma d’autes mès relaxades entà que cada un pogue trapar çò que cèrque. Pendent es tres dies s’impartirà formacion entàs participants deth challenge, a cargue de tecnics qualificadi per ACNA e ECAM (FEEC). Es talhèrs que s’impartiràn de manèra online (pre-eveniment) o offline (pendent er acte) tractaràn era seguretat, era tecnica adequada e eth materiau qu’ei besonh entà practicar skimo de manèra eficienta, segura e divertida.

E encara mès, ath long de tota era dimenjada se haràn activitats culturaus, ludiques e formatives entàs participants e acompanhants.

Entà poder completar aguesta informacion, podetz clicar en següent ligam.