Aguest mes de junh s’a hèt ua naua edicion deth salon deth sector toristic catalan, eth B-Travel, entà promocionar era aufèrta de torisme naturau, de familha e culturau dera demarcacion de Lhèida
Eth Patronat de Torisme dera Deputacion de Lhèida participèc en Salon-B-Travel, damb er espaci “Ara Lhèida” laguens der estand dera Agéncia Catala de Torisme, entà hèr a conéisher a un public de proximitat era ampla aufèrta de torisme de natura, cultura, de torisme actiu, enogastronomia, familiau, rurau e d’alotjaments que s’aufrís ena demarcacion de Lhèida.
Era importanta hèira B-Travel, celebrada der 11 ath 13 de junh, ei considerada com eth salon de referéncia deth sector toristic catalan. Per aguest motiu, er espaci “Ara Lhèida” virèc ar entorn de méter en valor eth torisme saludable e sostenible emmarcat per un paisatge naturau unic qu’aufrissen es comarques deth Pirenèu e era lana de Lhèida.
Era finalitat d’aguesta naua edicion deth salon B-Travel siguec era de reactivar eth sector toristic refortint era imatge de seguretat e confiança ena activitat toristica, que s’a vist mercada pera pandèmia dera COVID-19 e es conseqüéncies qu’a agut aguesta sus es diferenti sectors.
Pendent er ostiu deth 2020, tres de cada quate toristes que s’alotgèren enes establiments d’osteleria deth Pirenèu e es Tèrres de Lhèida èren catalans. Dera demarcacion de Lhèida, exceptuant era ciutat de Lhèida e es municipis dera lana, tanquèren era sason damb uns resultats fòrça satisfactòris per dessús des previsions, a maugrat qu’era situacion provocada pera pandèmia e totes es restriccions de desplaçaments qu’afavoriren eth torisme de proximitat.
Ampla aufèrta d’experiéncies e propòstes d’Ara Lhèida
Es prepauses que se trobèren es visitants deth B-Travel enes taulèrs d’Ara Lhèida (Tèrres de Lhèida e Pirenèu de Lhèida) sigueren fòrça variades, des d’aufrir ua estada relaxada e reparadora enquia ues vacances entorades d’emocionantes experiéncies ar aire liure damb espòrts d’aventura.
Tanben cau remercar era existéncia d’airaus de gran interès naturau qu’an favorit era arribada de diuèrsi reconeishements entàs paratges de Lhèida, un d’eri, era certificacion internacionau “Biosphere Destination” qu’acredite eth Pirenèu e es Tèrres de Lhèida coma destinacion toristica responsabla e sostenibla.
Entrada gratuïta damb eth Club amics de Lhèida
Eth Patronat de Torisme facilitèc enguan era entrada gratuïta as sòcis deth Club d’Amics de Lhèida per miei d’un còdi que permetie gestionar-se era entrada en linha damb un còdi gratuït, coma a hèt dejà en edicions anteriores.
