Er aument deth torisme de proximitat e de natura provocat pera pandèmia dera COVID19 a metut en relhèu eth besonh de regular eth nombre de places e es accèssi de visitants ena majoria des espacis naturaus dera demarcacion.

Er objectiu ei preservar aguesti paratges naturaus de naut valor ecologic entà poder-ne seguir gaudint, e ua des manères d’evitar massificacions a estat era aplicacion d’ua taxa d’accès enes estacionaments. A compdar d’aguest mes d’agost en parquing dera Pica d’Estats, en Parc Naturau deth Naut Pirenèu, se crubarà 5€ per veïcul e dia, entà evitar eth collapse viscut pendent er ostiu passat. Un aute exemple lo trobam ena Val d’Aran, a on deth 7 de juriòl enquia seteme, i aurà endrets com era Bassa d’Arres, era Artiga de Lin o Varradòs que seràn limitadi. Ath delà se i harà ua resèrva preliminara via internet.

Ena Baronia de Rialb, aguest an s’a optat per crubar entà accedir tath horat deth Bulí e entre eth 15 de juriòl e eth 15 de seteme i aurà pas regulat, atau com en Camarasa, que s’a optat per crubar entà poder accedir tar airau ludic deth riu Segre.

En pr’amor de milhorar es accèssi tà paratges naturaus, eth Bus deth Parc Nacionau d’Aigüestòrtes e estanh de Sant Maurici a presentat es milhores entad aguesta sason, aportant ua major cobertura e digitalizacion. En aguest sens, s’a ampliat era cobertura orària entà qu’es usatgèrs que volguen gaudir deth Parc ac poguen hèr, atau qu’a compdar des 6 ores deth maitin enquiàs 21 ores s’aufrirà cobertura. E entà facilitar er accès ara informacion per part des usatgèrs, s’incorpòren còdis QR en totes es parades e se pòden crompar es bilhets dera web der operador.

Ath delà, entre d’autes nauetats, s’incorpòren 2 naues expedicions per sens entre eth Pla de l’Ermita e era Pobla de Segur, e entre eth Pla de l’Ermita e Sort. Entà qu’es viatgèrs poguen auer ua expedicion d’anada e de tornada coordinada damb es auti mejans de transpòrt e favorir atau es connexions damb eth tren dera Pobla tà Lhèida.

Foto: Generalitat de Catalunya