Era 30au edicion deth Hestau de Cultures deth Pirenèu, eth Dansàneu, se celebrarà enes Vals d’Àneu deth 25 de juriòl ar 1 d’agost. Aguest an era programacion aurà coma èishi principaus era memòria istorica, era recuperacion patrimoniau, eth supòrt as projèctes pirenencs e es prepauses de qualitat.

Eth Consell Cultural de les Valls d’Àneu, entitat organizadora deth hestau, hè un pas endeuant e pendent ueit dies prepausarà formats e disciplines fòrça diferentes entre eres, acarant tot un rèpte ena organizacion der eveniment. Aguesti rèptes son er acompanhament des artistes e as projèctes deth territòri, era volentat de singularizar es prepauses artistiques e er apregondiment en aspèctes com era recuperacion dera memòria istorica e eth respècte ath territòri.

Cau rebrembar que Dansàneu a estat reconeishut damb un des Prèmis Nacionaus de Cultura aguest 2021 peth Consell Nacional de la Cultura i les Arts (CoNCA) e ena edicion d’enguan convidarà a artistes coma Maria del Mar Bonet, Mishima, Sílvia Bel, Núria Guiu, Roger Mas, Joan Garriga, entre d'auti.

Dansàneu a metut ena venta mès de 1.500 entrades entàs espectacles de pagament, encara que se mantien activitats gratuïtes ath long des ueit dies que dure eth hestau. Totes es activitats auràn besonh d’un contròl prèvi d’accès e deth seguimet estricte des mesures sanitàries vigentes en moment dera celebracion deth hestau.