Eth programa Adventure Atlas, dirigit pera periodista Vanessa Olmos, dedique un capítol sancèr ath Torisme Actiu de Lleida. Eth programa s’emeterà a partir deth mes de seteme per Movistar Plus e posteriorament per Discovery Channel (un canau de television de soscripcion nòrd-american), entre d’autes televisions internacionaus. Eth sòn contengut, que s’enregistre en castelhan e en anglés, tanben se difonerà per diferentes plataformes en linha coma YouTube e Instagram.

Aguesta productora a visitat es comarques dera Noguera, era Alta Ribagorça, eth Pallars Sobirà, eth Pallars Jussà, er Alt Urgell e eth Solsonès a on era presentadora, Vanessa Olmos e eth sòn òme an desvolopat diferentes activitats d’aventura, e en bères ues tanben i an participat es sues dues mainades. Ei damb totes es experiéncies viscudes en cada episòdi que se cree un gran atles d’aventures.

Eth recorrut pes comarques de Lleida comencèc eth 13 de mai en Pallars Sobirà, a on practiquèren rafting e idrospeed, seguit per Bungee Jumping (saut de còrda) en Solsonès, Trail Running e senderisme ena Alta Ribagorça, esquí nautic en barratge de Terradets en Pallars Jussà e via ferrata en Alt Urgell. En aguesti dies de recorrut tanben an podut gaudir deth patrimòni e aufèrta culturau deth territòri com eth romanic dera Vall de Boí o en Centre d’Observacion der Univèrs deth Montsec, entre d’auti.

De un aute costat, era revista Luxury Traveling, especializada en viatges e estils de vida, dedique un reportatge ara aufèrta toristica deth Pirenèu de Lleida. Eth viatge de 4 dies trauessèc es comarques dera Alta Ribagorça, Pallars Sobirà, Alt Urgell e Solsonès entà hèr a arribar era aufèrta toristica a un public de proximitat a trauès de diuèrsi formats e plataformes entara sason d’ostiu que ven.

Eth viatge pes comarques deth Pirenèu de Lleida comencèc ena Alta Ribagorça damb era practica de BTT electrica e ua visita ath romanic dera Vall de Boí. Ara seguida, practiquèren rafting en Pallars Sobirà. Atau madeish, aueren era oportunitat de hèr senderisme peth Parc Naturau deth Naut Pirenèu e eth Parc Naturau deth Cadí Moixeró, e visitar eth nucli antic dera Seu d’Urgell e eth Santuari deth Miracle en Solsonès.

Era revista Luxury Travelling, destinada a un public exigent que cerque experiéncies autèntiques, se distribuís enes sales VIP d’AENA, enes trens de longa distància e AVE de Renfe e entre es sòcis d’Elit Excellence (Federacion Espanhòla deth Luxe), e tanben en format digitau ena plataforma Pressreader.