Eth Patronat de Torisme a participat ena 41au edicion de FITUR, que s’a hèt deth dimèrcles 19 ath dimenge 23 de mai en Madrid entà hèr a conéisher era aufèrta de torisme actiu, de natura e cultura entre d’auti productes, deth Pirenèu e es Tèrres de Lleida.
Era participacion ena hèira demorèc inscrita laguens deth taulèr de Catalonha en pabelhon 7 damb er espaci Pirenèus e era aufèrta toristica des conselhs comarcaus der Alt Urgell, era Alta Ribagorça, era Cerdanya, eth Pallars Jussà, eth Pallars Sobirà e eth Solsonès, e damb er espaci Tèrres de Lleida, damb era des conselhs comarcaus des Garrigues, era Noguera, eth Pla d’Urgell, era Segarra, eth Segrià e er Urgell. Era Val d’Aran, coma en ues autes edicions passades, compdèc damb un taulèr pròpi ath laguens dera mèrca Pirenèus en espaci dera Agéncia Catalana de Torisme.

Se prevé qu’entara campanha d’ostiu d’enguan, era demarcacion de Lleida se torne a postular coma ua des destinacions toristiques d’interior e de montanha mès atractives der Estat, especiaument peth caractèr rurau damb grani espacis dubèrt e de natura deth nòste territòri. Tanben cau remercar qu’aguesta primauera s'a obtengut era certificacion "Biosphere Destination" perque Lleida ei ua destinacion toristica responsabla e durabla. Se consolide un des objectius deth Plan Estrategic deth Pirenèu e Tèrres de Lleida (2019‐2022) que promò eth Patronat de Torisme dera Deputacion de Lleida.

Er espaci “Ara Lleida” s’a articulat ath torn d’imatges des principaus publicacions qu’editen eth Patronat, es conselhs comarcaus e es burèus de torisme dera demarcacion, acompanhades deth sòn respectiu QR entà facilitar-ne era consulta e descarga. Tanben s’a projectat ena tablet que i auie en taulèr eth vidèo de presentacion dera destinacion.

Er 11 de junh que ven, e enquiath dia 13, comence ua auta edicion de B-Travel, eth Salon deth Torisme en Barcelona a on tanben ei previst que Pirenèus e Tèrres de Lleida i participen laguens deth taulèr de Catalonha.