Es comarques deth Pirenèu acuelheràn, de mai a octobre, era 6au edicion des Hestaus de Senderisme des Pirenèus. E era demarcacion de Lleida n’aurà un protagonisme especiau, ja que des 13 que se hestejaràn en totau, 9 se haràn en Pirenèu de Lleida.

Des principaus nauetats tad aguesta edicion cau remercar-ne es 4 hestaus de naua incorporacion: eth der Alt Urgell, eth de Sort, era Vall d'Àssua e eth Batlliu; eth deth Solsonès e eth Summit Val d'Aran. Es persones que vagen tà bèth un des hestaus poiràn participar en concors fotografic damb es imatges que se publiquen enes hilats sociaus damb era etiqueta #FSP2021.

Es hestaus, damb ua durada d'entre 2 e 7 dies, aufriràn rotes guidades a prètzi inferiors as abituaus com ua oportunitat excellenta tà gaudir des servicis de guides locaus que descorbiràn era cara mès originau e, soent, desconeishuda des cornèrs deth nòste Pirenèu. Aguest projècte s'adapte totaument ara linha de torisme durable que ja hè temps que i trabalhe eth Patronat de Torisme.

Ath delà de rotes a pè, es activitats programades taben permeten conéisher era cultura e era gastronomia locau damb degustacions gastronomiques, visites tà musèus, concèrts o presentacions de libres. Ua ocasion de luxe tà descorbir eth patrimòni e cultura locau des comarques deth Pirenèu.

Es hestaus que se hèn ena demarcacion de Lleida que son:

• Lo Festival de Senderisme de la Conca Dellà (Pallars Jussà) deth 21 ath 23 de mai.
• Cerdanya Happy Walking deth 10 ath 13 de junh.
• Festival Camina Pirineus Alt Urgell deth 23 ath 27 de junh.
• Val d’Aran Walking Festival deth 28 de junh ath 4 de junhsèga.
• Festival de Senderisme Vall Fosca-Pirineus (Pallars Jussà) deth 15 ath 18 de junhsèga.
• Summit Val d’Aran deth 23 ath 29 d’agost.
• Senderi-Festival de Senderisme de Sort, la Vall d’Àssua i el Batlliu (Pallars Sobirà) deth 3 ath 5 de seteme.
• Festival de Senderisme del Solsonès eth 18 e 19 de seteme.
• Vall de Boí Trek Festival (Alta Ribagorça) deth 9 ath 12 d’octobre.