Era revista Descobrir hè ua crida amassa damb es principaus collectivitats de torisme rurau e agents toristics deth país en un manifèst a on se demane que se profiten es aprendissatges hèti ath long dera pandèmia tà auançar de cap a un modèl toristic basat en desvolopament durable.

Eth manifèst, public d’ençà deth mes de seteme, a eth supòrt de diuèrses institucions e non hè guaire qu’eth Patronat de Torisme dera Deputacion de Lleida ven d’aprovar era sua adesion ara iniciativa per unanimitat deth conselh administratiu.

Eth manifèst demane que se plantege damb urgéncia eth debat sus eth modèl toristic ara que i a sus era taula es contradiccions d’un sistèma basat en torisme internacionau de masses. Se propòse que se prenguen cinc mesures basiques, com aplicar critèris de desvolopament durable, promòir estrategicament eth torisme de proximitat, milhorar era aufèrta toristica e era sua ocupacion, ordenar era activitat entà combàter era massificacion e, tà acabar, crear ua taula unitària de toti es agents implicadi entà coordinar es politiques de torisme.

Ja son fòrça es institucions que s’an posicionat a favor d’un cambi de modèl toristic.
Eth Manifèst se pòt liéger integraument ena plana manifest.descobrir.cat