Notícies

Taull-poblacio-Charm

Taüll, localitat damb encant deth projècte Charm

Dimecres, març 31, 2021

Era localitat de Taüll represente ath hilat europèu de pòbles damb encant deth projècte europèu Charm

CHARM qu’ei un projècte europèu, entestat pera Agéncia Catalana de Torisme (Generalitat de Catalonha), qu’a coma finalitat promòir era creacion de fluxes de torisme entà zònes ruraus o mens toristiques e fomentar-ne eth sòn patrimòni istoric, tradicionau e paisatgistic. Es visitaires an era oportunitat de descurbir endrets pòc coneishudi e massificadi e, entornejadi de natura es 365 dies der an. Aguesta accion contribuís a diversificar era aufèrta toristica e a desvolopar era economia locau.

Aguest mes de març eth projècte ja ei ua realitat damb era creacion d’ua rota de 10 pòbles damb encant de cinc païsi diferenti: Alemanha, Finlàndia, Portugal, Itàlia e Espanha. Damb era finalitat de poder implicar as visitaires ena zòna de destinacion e que coneishen era vida e es tradicions d’aquiu, ena pagina web deth projècte CHARM s’arremassen mès de 50 activitats e mès de 20 productes toristics tà poder víuer ua experiéncia integrada dera zòna que se visite.

Eth pòble de Taüll qu’a atractius toristics des grani, com ua arquitectura romanica majestuosa declarada Patrimòni dera UNESCO, o un entorn paisatgistic qu’entornege tota era zòna dera Vall de Boí, ena comarca dera Alta Ribagorça (damb eth Parc Nacionau d’Aigüestòrtes e Estanh de Sant Maurici coma referéncia principau). Ath laguens d’aguest entorn se propòsen activitats entà conéisher eth pòble e es sues legendes, es glèises romaniques, eth balneari de Caldes de Boí, es parcs nacionaus naturaus que l’entornegen, e tanben es sòns productes artesanaus e era sua gastronomia locau.

Aguest hilat toristic ei ua oportunitat de projeccion deth torisme en un mon pòstcovid-19, a on es zònes ruraus e mens massificades auràn un gran potenciau entà descurbir.