Era fin des restriccions de confinament municipau e era Setmana Santa tan apròp an representat un aument important des resèrves tad aguesti dies de hèsta ena demarcacion de Lleida, especiaument ena zòna deth Pirenèu, a on se demore qu’era aucupacion se place per dessús deth 85%.

Per tot eth territòri podem trobar activitats entà toti es gosti e satisfèr es ganes d’espacis naturaus e en aire liure qu’a era gent dempús de tant temps damb restriccions de mobilitat. Enguan, era campanha de Setmana Santa vierà mercada pera responsabilitat e era recèrca d’espacis luenh dera massificacion a on poder gaudir dera natura, e es comarques de Lleida que son er endret ideau.

Peth sòn costat, es pistes d’esquí que seràn un des lòcs damb mès afluéncia, pr’amor der aument de resèrves hètes dempús dera eliminacion deth confinament municipau. Es pistes d’esquí barraràn era sason a compdar deth dia 5 d’abriu, que coïncidís damb eth Deluns de Pasca, dempús d’ua temporada que presentarà resultats inferiors a ua sason normau. Maugrat tot, es pistes d’esquí aupin lheidatanes an, ara madeish, ua aufèrta de mès de 160 km de pistes tad aguesti dies de Setmana Santa e uns celhs de nhèu que van des 25 as 120 cm.

Enguan s’an desvolopat es programes d’Espòrt Blanc Escolar (EBE) com ua iniciativa entà apropar aguest espòrt as estudiants des escòles deth Pirenèu.

Tad açò qu’ei as activitats de torisme actiu e aquatiques, tanben presenten, tad aguesta Setmana Santa, donades fòrça optimistes en çò que tanh as resèrves. Ua aufèrta qu’en conjunt deth territòri se hig a ua gama d’iniciatives de torisme rurau, torisme de natura, torisme culturau e era madeisha gastronomia, que configuren es diferenti lòcs d'atraccion entàs visitaires en aguestes dates enes comarques deth Pirenèu e es Tèrres de Lleida.

D’auti lòcs dera demarcacion que se demore que receben un nombre important de visitaires ath long de Setmana Santa que son eth Parc Nacionau d’Aigüestòrtes e Estanh de Sant Maurici, es glèises dera Vall de Boí, eth Centre d’Observacion der Univèrs deth Montsec, eth Monastèri de Vallbona de les Monges, era Rota des Castèths de Lleida o era madeisha Seu Vella de Lleida.