Rosa Pujol, presidenta dera comission de Torisme dera Deputacion de Lhèida, e Juli Alegre, director deth Patronat de Torisme dera Deputacion de Lhèida, aueren ua reünion eth passat mes d’octobre, ena sedença der organisme, damb era naua directora dera Agéncia Catalana de Torisme (ACT), era lheidatana Arantxa Calvera. Pendent aguest prumèr encontre, Pujol e Alegre presentèren a Calvera eth Prètzhèt deth Patronat, damb eth quau se refortís eth compromés damb un modèl toristic que melhore er entorn e era qualitat de vida dera poblacion locau e que fomente eth progrès en territòri. 

Un aute des tèmes qu’expausèren a Calvera ei eth Plan Estrategic de Torisme deth Pirenèu e es Tèrres de Lhèida entath periòde 2023-2026, eth quau a de servir coma huelh de rota deth desvolopament toristic dera destinacion entàs ans venents. Un des principaus elements que caracterizen aguest plan ei era grana participacion des agents claus deth sector toristic lheidatan ena elaboracion dera estrategia. Ua estrategia que contunharà de trabalhar e en tot jogar era carta de quate pilars basics: Sostenibilitat, Excelléncia, Corresponsabilitat, e Innovacion.

Ath long dera reünion se mostrèc per andues parts eth compromés de mantier era collaboracion deth Patronat de Torisme dera Deputacion de Lhèida damb era Agéncia Catalana de Torisme entara promocion toristica deth Pirenèu e es Tèrres de Lhèida.