Un totau de 27 enterpreses dera demarcacion de Lhèida s’an inscrit ena quatau convocacion deth procès entà entrar a hèr partida deth projècte Moturisme Ara Lleida. Eth promotor dera iniciativa, Patronat de Turisme de la Diputació de Lleida, barrèc eth tèrme d’inscripcions eth passat 31 d’agost.
Era iniciativa toristica, qu’enguan complís dètz ans dempús dera sua creacion, permet acuélher damb garentides es usatgèrs de mòtos que visiten eth territòri. Er objectiu deth projècte ei fomentar eth torisme entre es amators des mòtos, en tot aufrir-les era escadença de descorbir eth Pirenèu e es Tèrres de Lhèida a trauès de 10 rotes que percorren era demarcacion.
Es enterpreses que s’an inscrit entada aguesta naua convocacion ara son en plen procès de formacion, per çò qu’entà acreditar-se ei indispensable amiar a tèrme dues sessions formatives online. Es naui membres de Moturisme Ara Lleida deuen complir tota ua seria de condicions abans d’èster admetudi, coma per exemple emplir un qüestionari d’autoavaloracion entà acreditar que se complissen es normes establides e dispausar de compromés Biosphere o autament èster aderent dera CETS. Egaument, an de besonh eth permés de dubertura municipau, èster inscriti en Registre Toristic dera Generalitat de Catalonha, auer materiau de promocion e atencion as clients aumens en un idiòma estrangèr, entre d’autes condicons.
Moturisme Ara Lleida establís aguest sistèma de garentida mejançant un sagèth de qualitat, que s’obten de manèra gratuïta e identifique establiments de lotjament toristic e servicis complementaris, en tot includir-i restauracion, cafetaries e musèus, entre d’auti. Er objectiu fondamentau ei qu’es usatgèrs gaudisquen d’uns establiments qu’an pensat a satisfèr es sòns besonhs especifics, un hèt que genère un efècte de empatia de marca envèrs era enterpresa e eth territòri. Dera madeisha manèra, es establiments aderents dispausen d’airines e recorsi entà acuélher un sector en plen creishement, damb capacitat de generar ingrèssi addicionaus pendent tot er an e favorir era dessasonalizacion. Eth còst de participacion en aguest procès ei gratuït pr’amor que Patronat de Turisme assumís eth 100% dera despena dera formacion e dera acreditacion.
Calendari de formacions:
- Deluns, 13 d’octobre de 2025 – Formacion obligatòria conjunta: Qu’ei Motorisme – Eth viatgèr en mòto – Exigéncies generaus
- Deluns, 20 d’octobre de 2025 – Session 2: Formacion obligatòria especifica entà lotjaments
- Deluns, 27 d’octobre de 2025 – Session 3: Formacion obligatòria especifica entà servicis complementaris
Mès informacion:
