Era onzau edicion deth hestivau Lhèida Air Challenge a amassat era passada dimenjada uns 9.000 visitaires en aeropòrt d’Alguaire e 110 expositors procedenti de tot er Estat espanhòu –12 mès qu’est an passat–. Peth prumèr còp an participat enterpreses expositores de Madrid, Burgos, Palma de Malhòrca e es isles Canàries, un hèt que demòstre qu’era hèira ja ei un concors de referéncia a nivèu estatau laguens deth segment aeronautic.
Es expositors an barrat ath torn de 600 contractes comerciaus –un 50% mès qu’est an passat–, e era màger part an mostrat era sua satisfaccion pes resultats deth concors. Èren distribuïdi en tres espacis diferenciadi: eth dedicat ara activitat deth New Space e naues tecnologies aeronautiques e der espaci; eth der encastre dera formacion, e eth centrat enes enterpreses deth sector aeronautic. Cau díder que 25 des expositors an estat escòles de formacion de pilòts; i an agut nau marques distribuidoires d’aeronaus –quate mès qu’est an passat– e tanben i a agut un gran increment d’enterpreses dedicades as dròns.
Egaument, era hèira a compdat damb era participacion d’ues 130 aeronaus, 90 des quaus governades per pilòts particulars (fly-in). Era hèira aufrie un espaci entara compravenda in situ d’aeronaus de dusau man, damb avionetes e elicoptèrs, a on es visitaires podien veir e verificar es prestacions des aparelhs.
Pendent tota era dimenjada eth hestivau Lhèida Air Challenge a aufrit activitats entà toti es publics e edats, damb vòls acrobatics, conferéncies sus aeronautica, activitats entà mainatges, foodtrucks entà toti, fly-in entà pilòts, sortegi e prèmis. Enes charrades, expèrts d’escòles, aeroclubs e institucions an parlat de tèmes coma es condicions entà hèr-se contrarotlaire, pilòt o personau de cabina de passatgèrs; era aviacion ultraleugèra; eth vòl sus era mar; era profession deth contraròtle aerian, o era formacion de mecanica d’aviacion, entre d’autes.
Mès informacion:
