Patronat de Turisme de la Diputació de Lleida a ampliat enquia 46 es experiéncies deth projècte “Oleotorisme de Lhèida. Eth gost dera tèrra”. Son prepauses toristiques relacionades damb er òli que aufrissen 28 enterpreses e entitats de Garrigues, Segrià, Urgelh e Noguera. Egaument, eth projècte includís es restaurants de Garrigues que dispausen deth distintiu Vèrge Extra, eth quau identifique es establiments de restauracion qu’acrediten, per exemple, un minim d’un 80% d’òli vèrge extra de Garrigues ena codina e un 100% ena sala.
Es productors d’òli deth territòri fomenten damb aguestes experiéncies un torisme sostenible e responsable, basat en un consum de productes de proximitat, ath madeish temps que trabalhen entara conservacion des païsatges e dera biodiversitat, pr’amor qu’era agricultura tradicionau contribuís ara mantenença des païsatges.
Noguera, Palhars Jusan, Segrià, Urgelh e, sustot, Garrigues, començaràn aguest mes d’octobre –e s’alongarà enquia de cap tè miei gèr– era campanha de cuelheta d’olives e d’elaboracion der òli d’oliva extra vèrge, considerat un des melhors deth mon. Pendent aguesti tres mesi, ath delà deth catalòg d’experiéncies oleotoristiques que promò eth Patronat, eth visitaire a era escadença de visitar era majoritat de cooperatives e molins, e familiarizar-se damb eth procès d’elaboracion der òli, de crompar-lo sus plaça e de gaudir des activitats que s’organizen. Egaument, a era escadença de conéisher es atrèits païsatgistics, patrimoniaus e gastronomics des zònes de produccion.
Cau rebrembar qu’es comarques lheidatanes acuelhen ua quinzea de jornades gastronomiques, hèires e hèstes centrades en òli, ath delà d’autes activitats toristiques parallèles.
Mès informacion:
