Er ensem monumentau deth Turó de la Seu Vella recebec 93.632 visitaires er an 2024 e pendent es prumèrs cinc mesi deth 2025 ja n’a somat 29.604, çò que represente un increment deth 9,4 % per çò qu’ei deth madeish periòde der an passat. Aguestes donades se heren a conéisher ena reünion ordinària deth Conselh Generau deth Consòrci deth Turó de la Seu Vella de Lleida celebrada eth passat mes de junhsèga.
En cors dera reünion, tanben s’a hèt bilanç des activitats que se debanèren en ensem monumentau pendent eth 2024, entre es quaus destaquèren 22 eveniments corporatius d’enterpresa e congrèssi, actes solidaris, esportius, culturaus, ceremònies privades e d’auti eveniments, ath delà der usatge dera Seu Vella coma platèu de diuèrses produccions audiovisuaus. Per çò qu’ei d’aguest ostiu, en Turó de la Seu Vella s’i debanen mès d’ua vintea d’activitats que combinen era descubèrta deth patrimòni damb es arts e era cultura, coma concèrts, circ, lectura, visites tematiques, astronomia e iòga, entre d’auti. Tanben s’i pòt hèr, de forma autonòma, er itinerari autoguidat entà public infantil e familhau “Ara recèrca de Blau”. Era programacion complèta se pòt consultar ena pagina web deth Consòrci deth Turó de la Seu Vella
Egaument, pendent era reünion s’informèc que contunhen a bon ritme es trabalhs dera prumèra fasa d’òbres des cubèrtes deth Clastre, que s’inicièren en abriu e se preve que finalizen ena tardor, damb ua afectacion minimau enes visites ath monument. Tanben se preve qu’acaben ena tardor es òbres ena zòna dera Lengua de Sèrp e en Baloard deth Rei, a on s’installarà materiau interpretatiu mejançant còdis QR e s’abilitarà entà que se pogue visitar.
Entre es accions previstes entàs mesi venents i a era redaccion des projèctes d’apariament dera tèrra des capèles deth Clastre e dera Sacrestia, era actualizacion e digitalizacion der inventari dera Seu vella, e tanben era installacion d’ua barralha de proteccion des rèstes arqueologiques plaçades e integrades ena muralha, en espaci de La Tenalla. Enguan s’investiràn 1,7 milions enes diferentes intervencions en ensem monumentau.
Fin finau, eth Conselh aprovèc sollicitar ar Ajuntament de Lhèida era regulacion dera mobilitat ena Seu Vella e adaptar es oraris de dubertura dera encencha ath servici de restauracion deth Turó de la Seu Vella.
Mès informacion:
