Patronat de Turisme de la Diputació de Lleida amièc a tèrme recentament ua session tecnica de trabalh damb es conselhs comarcaus ena quau se presentèc era prepausa de Plan d’Accions entath 2025. Ena amassada s’expliquèren es accions que s’an previst entà enguan, damb er objectiu de comentar cadua des accions e recuélher es aportacions des tecnicians de torisme des comarques dera demarcacion.

Eth Plan d’Accions deth Patronat entar an 2025 seguís es estrategies de promocion, comunicacion e marqueting e es linhes de trabalh que presente eth nau Plan de Marqueting entàs quate ans venents, deth 2025 ath 2028, que tanben se hec a conéisher as tecnicians des conselhs comarcaus pendent era madeisha session de trabalh.

Un des punts enes que persutarà especiaument eth Patronat de Turisme enes ans venents serà eth compromés damb un modèl toristic sostenible e regeneratiu, en tot cercar atrèir un visitaire conscient e responsable damb eth territòri e damb eth resident. Ath madeish temps, se potenciaràn es productes damb nauta valor ahijuda e es experiéncies singulares e autentiques deth territòri, en tot méter era amira enes mercats catalan e estatau e en tot potenciar es internacionaus de proximitat.