Eth vicepresident de Patronat de Turisme de la Diputació de Lleida, Juan Antonio Serrano, participèc eth 27 de mai ena jornada Cultura e Enterpresa: impacte e transformacion entath futur de Lhèida, organizada en Mas de Colom de Tàrrega pera Fundació Catalunya Cultura e Mas de Colom-Casa Borges. Serrano intervenguec en ua taula redona ena que defenec qu’era cultura, amassa damb era natura e era gastronomia, ei un des grani motors deth torisme en Pirenèu e es Tèrres de Lhèida.
Eth Patronat tanben siguec present eth mes de mai en ua auta jornada relacionada damb eth sector, organizada aguest còp pera sedença lheidatana deth Collègi d’Economistes de Catalonha damb motiu deth 4au Congrès d’Economia e Enterpresa de Catalonha. En cors d’un debat sus eth modèl de negòci toristic deth territòri, a on participèc eth vicepresident Juan Antonio Serrano, s’identifiquèren coma escomeses de futur eth refortiment e era melhora des experiéncies, eth relèu generacionau e eth nau modèl dera taxa toristica.
Egaument, eth Patronat participèc eth passat mes de mai ena 7au Jornada de Torisme de Solsonés, que se debanèc en Salin de Cambrils, que clauèc Juli Alegre, director der organisme toristic. En cors dera jornada se presentèren as assistents –ua quarantea d’agents toristics e representants institucionaus–, era aufèrta toristica e es productes locaus deth municipi amfitrion d'Odèn e dera comarca de Solsonés en generau.
Es representants locaus heren a conéisher projèctes deth territòri coma eth Parc Geologic e Minèr Contrafòrts deth Pirenèu, eth madeish Salin de Cambrils, eth Zòo deth Pirenèu e es activitats sensoriaus e familhaus organizades per Sàmara Natura entà descorbir era fauna e era flòra deth municipi.
Mès tard, s’expausèren autes iniciatives de tota era comarca, coma eth Tour du Lord ena Val de Lord, es activitats d’Astrosolsonés en Castèth de Lladurs, es visites guidades de Solsona Experience, accions de dinamizacion de Territori de Masies e era restauracion dera escòla rurau e era creacion d’un espaci museïzat entà ensenhar-la en Castellar de la Ribera.
Fin finau, era Agéncia Catalana de Torisme presentèc es darrères nauetats deth Grand Tour de Catalonha e, ena vrespada, es participaires poderen visitar era Hònt deth Vermelh, un espaci naturau a on s’an creat uns itineraris entà conéisher era flòra e era fauna e s’an adoptat mesures entà protegir es arrates-caudes, audèths insectivòrs, parpalhòles e orquidèes.
Mès informacion:
