Eth mes de març se dauric eth procès de participacion ciutadana deth decrèt de proteccion especiau der espaci naturau des Montanhes de Prades qu’includís era sua declaracion coma parc naturau, e tanben eth sòn Plan de gestion de proteccion deth miei naturau e deth païsatge, era sua airina d’organizacion e gestion. Aguest ei un des darrèri passi abans dera metuda en marcha definitiva deth Parc, qu’aurà eth nòm de Parc Naturau des Montanhes de Prades, Poblet e era Serrada de La Llena.

Eth procès de participacion se barrarà tà començaments de mai entà estudiar es aportacions e decidir tecnicament quines se pòden includir en decrèt. Un decrèt que delimite era superfícia deth futur parc naturau en 43.700 ectares e includís 24 municipis des comarques de Naut Camp, Baish Camp, Garrigues, Conca de Barberà e Priorat. Serà eth dusau mès gran de Catalonha, darrèr deth Parc Naturau de Naut Pirenèu.

En concrèt, e per çò qu’ei dera demarcacion lheidatana, incorpòre territòris des municipis de Juncosa, la Pobla de Cérvoles e El Vilosell. Es limits deth Parc s’an definit segons critèris de coeréncia geografica, adaptacion ara orografia, limits fisics e representativitat d’abitats e espècies d’interès entara conservacion e de connectivitat. Er includiment dera Serrada de La Llena, en extrèm nòrd-oèst der encastre ahig abitats e espècies de nauta valor e refortis era connexion ecologica damb Garrigues, en tot tèisher un vertadèr hilat d’infrastructura verda entre es espacis prelitoraus deth Camp de Tarragona e es planes de Lhèida. Aguesta continuitat d’abitats melhore era connexion integrau entre es Montanhes de Prades, era Sèrra de La Llena, es planes de Lhèida e eth Parc Naturau dera Serrada de Montsant.

Aguest serà eth prumèr nau parc naturau que se crearà dempús de 10 ans e se hè damb era participacion e eth supòrt deth territòri. Ath delà des valors naturaus e es beneficis qu’era creacion d’aguesta figura de proteccion supausarà entara preservacion des abitats e era biodiversitat d’aguestes comarques, devierà un element mès que contribuïrà ath desvolopament rurau sostenible, a fixar poblacion e a generar economia en territòri.

 Diputació de Lleida aurà era sua representacion en Conselh Rector des Montanhes de Prades, que serà er organ rector deth parc naturau, integrat tanben pera Generalitat de Catalonha, per representants des municipis deth parc e dera Deputacion de Tarragona. Era metuda en marcha deth nau Parc Naturau des Montanhes de Prades, Poblet e era Serrada de La Llena ei prevista entà començaments deth 2026.

Mès informacion:

https://participa.gencat.cat/processes/participacio-decret-muntanyes-prades